EP. 1 片頭
各位線頂ê聽眾朋友ta̍k-ê平安ta̍k-ê好，歡迎收聽做工á人pha-kheh-su̍h-to͘h，本季goán準備1 ê故事，beh來講hō͘各位聽，內容保証精彩phang-phài。
是ka-tī po khah bē chhàu-chho nih！
Eh，無膨風1--ē，是beh án-chóaⁿ siâⁿ人繼續聽，臭彈pûn雞胿kài要緊--lah！等--leh人走了了beh án-chóaⁿ？Ah…，好，我繼續紹介，這piàn故事是專工邀請台文大師「做工á人」為咱節目特別寫ê全新故事，koh邀請tio̍h專業ê配音員來替咱錄音…
Ah明明to̍h是你ka-tī 烏白chòaⁿ ê故事，koh the̍h手機á去hō͘ lín厝邊錄音，siáⁿ-mih大師，toh來ê專業配音員。
M̄-thang koh thuh臭--ah-lah，án-ne我是有才調主持hiⁿh，大師lóng mā是án-ne ka-tī臭彈chhèng--起-來-ê，拜托你嘴seng that--leh，等--leh我請你去食肉圓--lah。
你講--ê hōⁿ，我koh beh配四神湯ŏ͘。
好--lah好--lah，án-ne sòa--落-來請ta̍k-ke做夥來欣賞goán無暝無日，用心製作ê故事，A郎，請奏音樂…
明明to̍h真chhìn-chhái…
救人喔…
Kok-ūi sòaⁿ-téng ê thiaⁿ-chiòng pêng-iú ta̍k-ê pêng-an ta̍k-ê hó，hoan-gêng siu-thiaⁿ chò-kang-á-lâng pha-kheh-su̍h-to͘h，pún kùi goán chún-pī 1 ê kò͘-sū，beh lâi kóng hō͘ kok-ūi thiaⁿ，lōe-iông pó-chèng cheng-chhái phang-phài.
Sī ka-tī po khah bē chhàu-chho nih!
Eh，bô phòng-hong1--ē，sī beh án-chóaⁿ siâⁿ lâng kè-sio̍k thiaⁿ，chhàu-tōaⁿ pûn ke-kui kài iàu-kín--lah！Tán--leh lâng cháu liáu-liáu beh án-chóaⁿ？Ah…，hó，góa kè-sio̍k siāu-kài，chit piàn kò͘-sū sī choan-kang iau-chhiáⁿ Tâi-bûn tāi-su “Chò-kang-á-lâng” ūi lán chiat-bo̍k te̍k-pia̍t siá ê choân-sin kò͘-sū, koh iau-chhiáⁿ tio̍h choan-gia̍p ê phòe-im-oân lâi thè lán lo̍k-im…
Ah bêng-bêng to̍h sī lí ka-tī o͘-pe̍h chòaⁿ ê kò͘-sū，koh the̍h chhiú-ki-á khì hō͘ lín chhù-piⁿ lo̍k-im, siáⁿ-mih tāi-su，toh lâi ê choan-gia̍p phòe-im-oân。
M̄-thang koh thuh-chhàu--ah-lah，án-ne góa sī ū châi-tiāu chú-chhî hiⁿh，tāi-su lóng mā sī án-ne ka-tī chhàu-tōaⁿ chhèng--khí-lâi-ê，pài-thok lí chhùi seng that--leh，tán--leh góa chhiáⁿ lí khì chia̍h bah-oân--lah。
Lí kóng--ê hōⁿ, góa koh beh phòe sù-sîn-thng ŏ͘.
Hó--lah hó--lah，án-ne sòa--lo̍h-lâi chhiáⁿ ta̍k-ke chò-hóe lâi him-sióng goán bô-mê-bô-ji̍t, iōng-sim chè-chok ê kò͘-sū，A-lông，chhiáⁿ chàu im-ga̍k…
Bêng-bêng to̍h chin chhìn-chhái…
Kiù lâng o͘h…
EP. 1 片尾
到底咱明華kah A桃ê誤解kám tháu ē開，A桃腹肚內ê囡á，明華kám beh chhē-siàu？劇情已經進行到上高潮
M̄ tio̍h chhut lah！Tú-chiah teh講古你是teh tuh-ku hio͘h？
Ĕ！是a婆hit chhut喔，好！Tú-chiah咱故事講到a婆--ā thiám kah beh死，the tī 椅á頂，人老bē kham-chit操siuⁿ thiám，soah chŏaⁿ án-ne目睭kheh kheh bē喘氣，in老伴--ê khioh柴--轉-來，kám有法度接受chiah nī酷刑ê事實？Mo͘h--轉-來ê桃á iû-koh beh如何是好--neh！
人a婆是teh歇睏niâ，mài烏白kâng判死刑lah！
Án-ne判無期--ê kám ē-sái？
你是法官 o͘h！
好，到底a婆生死如何？A公koh再來ài面對siáⁿ款ê命運--lē？邀請各位聽眾朋友後禮拜kāng 1 ê時間，繼續來收聽咱精彩ê故事──A婆婆婆婆婆婆！
是A郎m̄-sī a婆lah！Ta̍k-ke ài koh來ŏ͘！Eh！肉圓leh？肉圓！Tìⁿ無聽--leh hiⁿh？
Tàu-té lán Bêng-hôa kah A-thô ê gō͘-kái kám tháu ē khui, A-thô pak-tó͘ lāi ê gín-á, Bêng-hôa kám beh chhē-siàu? Kio̍k-chêng í-keng chìn-hêng kàu siōng ko-tiau
M̄ tio̍h chhut lah！Tú-chiah teh kóng-kó͘ lí sī teh tuh-ku hio͘h？
Ĕ！Sī a-pô hit chhut o͘h，hó！Tú-chiah lán kò͘-sū kóng kàu a-pô--ā thiám kah beh sí，the tī í-á téng，lâng lāu bē kham-chit chhau siuⁿ thiám，soah chŏaⁿ án-ne ba̍k-chiu kheh kheh bē chhoán-khùi，in láu-phōaⁿ--ê khioh chhâ--tńg-lâi，kám ū hoat-tō͘ chiap-siū chiah nī khok-hêng ê sū-si̍t？Mo͘h--tńg-lâi ê thô-á iû-koh beh jû-hô sī hó--neh！
Lâng a-pô sī teh hioh-khùn niâ, mài o͘-pe̍h kâng phòaⁿ sí-hêng lah!
Án-ne phòaⁿ bû-kî--ê kám ē-sái？
Lí sī hoat-koaⁿ o͘h!
Hó, tàu-té a-pô seⁿ-sí jû-hô? A-kong koh chài-lâi ài bīn-tùi siáⁿ khoán ê miā-ūn--lē? Iau-chhiáⁿ kok-ūi thiaⁿ-chiòng pêng-iú āu lé-pài kāng 1 ê sî-kan, kè-sio̍k lâi siu-thiaⁿ lán cheng-chhái ê kò͘-sū──A pô pô pô pô pô pô!
Sī A-lông m̄-sī a-pô lah! Ta̍k-ke ài koh lâi ŏ͘! Eh! Bah-oân leh? Bah-oân! Tìⁿ bô thiaⁿ--leh hiⁿh?
