EP. 9 片頭
各位線頂ê聽眾朋友ta̍k-ê平安ta̍k-ê好，歡迎收聽做工á人pha-kheh-su̍h-to͘h，真歡喜koh hâm ta̍k-ke tī空中再相會！
最近lóng感覺tòa tī都市tòa kah kài ak-chak，a̍h beh吵--死，真想beh搬去深山林內tòa，我beh去享受山內平靜ê生活，你感覺啥款？
無的確好ŏ͘，有好有bái--lah！
Án-chóaⁿ講，m̄是消遙kah ná神仙？
你ka想，深山林內to̍h是無厝邊，項項mā to̍h ài ka-tī來，beh食飯mā ài ka-tī煮neh，無像tī市內，siōng無四界lóng是Seven kah全家，隨時beh食siáⁿ lóng無問題。
有影to tio̍h，goán che都市sông lóng想kah kài簡單，無想tio̍h連食飯to̍h ài ka-tī處理。
Koh m̄-nā食飯niâ ŏ͘，破病beh看醫生mā tio̍h落山，食--ê用--ê lóng to̍h ài 1 piàn落山款ho͘ chiâu，無你想--ê hiah輕鬆--lah！
Aih，我to̍h天天，想tio̍h sáⁿ to̍h講sáⁿ，khah欠考慮，我看我mā是繼續做我ê都市sông to̍h好，ta̍k頓nā lóng ài ka-tī來，我ē起siáu！
你kám知影tòa深山林內連ùn-chiàng to̍h ē驚？
Hăⁿ!
Khah òaⁿ--leh chiah講hō͘ lí知，咱先進音樂--lah！好--無！
好！咱先來服務咱ê聽眾朋友，等--leh chiah聽你說分明！音樂請liâu！
Kok-ūi sòaⁿ-téng ê thiaⁿ-chiòng pêng-iú ta̍k-ê pêng-an ta̍k-ê hó, hoan-gêng siu-thiaⁿ chò-kang-á-lâng pha-kheh-su̍h-to͘h, chin hoaⁿ-hí koh hâm ta̍k-ke tī khong-tiong chài-siong-hōe!
Chòe-kīn lóng kám-kak tòa tī to͘-chhī tòa kah kài ak-chak, a̍h beh chhá--sí, chin siūⁿ beh poaⁿ khì chhim-soaⁿ-nâ-lāi tòa, góa beh khì hióng-siū soaⁿ-lāi pêng-chēng ê seng-oa̍h, lí kám-kak siáⁿ-khoán?
Bô tek-khak hó ŏ͘, ū hó ū bái--lah!
Án-chóaⁿ kóng, m̄ sī siau-iâu kah ná sîn-sian?
Lí ka siūⁿ, chhim-soaⁿ nâ-lāi to̍h sī bô chhù-piⁿ, hāng-hāng mā to̍h ài ka-tī lâi, beh chia̍h-pn̄g mā ài ka-tī chú neh, bô chhiūⁿ tī chhī-lāi, siōng bô sì-kè lóng sī Seven kah Choân-ke, sûi-sî beh chia̍h siáⁿ lóng bô būn-tê.
Ū iáⁿ to tio̍h, goán che to͘-chhī sông lóng siūⁿ kah kài kán-tan, bô siūⁿ tio̍h liân chia̍h-pn̄g to̍h ài ka-tī chhú-lí.
Koh m̄-nā chia̍h-pn̄g niâ ŏ͘, phòa-pēⁿ beh khòaⁿ i-seng mā tio̍h lo̍h-soaⁿ, chia̍h--ê ēng--ê lóng to̍h ài 1 piàn lo̍h-soaⁿ khoán ho͘ chiâu, bô lí siūⁿ--ê hiah khin-sang--lah!
Aih, góa to̍h thian-thian, siūⁿ tio̍h sáⁿ to̍h kóng sáⁿ, khah khiàm khó-lū, góa khòaⁿ góa mā sī kè-sio̍k chò góa ê to͘-chhī sông to̍h hó. ta̍k tǹg nā lóng ài ka-tī lâi, góa ē khí-siáu!
Lí kám chai-iáⁿ tòa chhim-soaⁿ-nâ-lāi liân ùn-chiàng to̍h ē kiaⁿ?
Hăⁿ!
Khah òaⁿ--leh chiah kóng hō͘ lí chai, lán seng chìn im-ga̍k--lah! Hó--bô!
Hó! Lán seng-lâi ho̍k-bū lán ê thiaⁿ-chiòng pêng-iú, tán--leh chiah thiaⁿ lí soeh hun-bêng! Im-ga̍k chhiáⁿ liâu!
EP. 9 片尾
Tú-chiah你講tio̍h ùn-chiàng ē驚tòa tī深山林內ê人，是án-chóaⁿ講？
像án-ne！你ka報住址，伊差不多是聽無，koh來你to̍h開始ka報路。
報路有siáⁿ問題？我tī市內不時mā teh kâng報，he nah有siáⁿ問題？
報路當然mā m̄是問題，問題是伊一直駛，jú駛jú憢疑！
Án-chóaⁿ講？
伊nā開始看tio̍h路邊有墓á埔，kui路lóng是竹林á，暗sàm暗sàm án-ne，to̍h ē開始問你beh到位ā--bē？一般ùn-chiàng lóng是駛jú遠jú好，你kan-na聽tio̍h伊問beh到bē，你to̍h知影伊心內tám-tám。你koh ka應講到1半niâ，你to̍h ē看tio̍h he ùn-chiàng表情piàn kah怪怪！
Hiah久koh iáu-bē到，有影是深山林內to tio̍h！
Koh來路jú來jú細條，點á膠路變做黃土路，司機ê表情to̍h jú來jú緊張án-ne，不時koh ē ùi ba̍k-khú-mih-á teh偷相我ê面！
伊kám是teh確認你是m̄是人？
Hèⁿ--lah，我感覺是！有時nā是e暗beh轉厝！Ùn-chiàng ê反應koh jú大！Só͘-pái我nā到厝，chhiāⁿ-chhiāⁿ ē ke hō͘ ùn-chiàng 1-kóa-á小費án-ne。
Ĕ，聽你講了，我a̍h是繼續來做我ê都市sông好--ah！
Hèⁿ ā！Tòa都市bē-bái--lah！咱節目ê時間mā差不多beh到--ah，多謝各位來捧場！後禮拜kāng時間ài koh來ŏ͘！Ló͘-la̍t！多謝！Pái-pāi！
Tú-chiah lí kóng tio̍h ùn-chiàng ē kiaⁿ tòa chhim-soaⁿ nâ-lāi ê lâng, sī án-chóaⁿ kóng?
Chhiūⁿ án-ne! Lí ka pò chū-chí, i chha-put-to sī thiaⁿ-bô, koh lâi lí to̍h khai-sí ka pò-lō͘.
Pò-lō͘ ū siáⁿ būn-tê? Góa tī chhù-lāi put-sî mā teh kâng pò, he nah ū siáⁿ būn-tê?
Pò-lō͘ tong-jiân mā m̄ sī būn-tê, būn-tê sī i it-ti̍t sái, jú sái jú giâu-gî!
Án-chóaⁿ kóng?
I nā khai-sí khòaⁿ tio̍h lō͘-piⁿ ū bō͘-á-po͘, kui lō͘ lóng sī tek-nâ-á, àm-sàm àm-sàm án-ne, to̍h ē khai-sí mn̄g lí beh kàu-ūi ā--bē? It-poaⁿ ùn-chiàng lóng sī sái jú hn̄g jú hó, lí kan-na thiaⁿ tio̍h i mn̄g beh kàu bē, lí to̍h chai-iáⁿ i sim-lāi tám-tám. Lí koh ka ìn kóng kàu 1 pòaⁿ niâ, lí to̍h ē khòaⁿ tio̍h he ùn-chiàng piáu-chêng piàn kah koài-koài!
Hiah kú koh iáu-bōe kàu, ū-iáⁿ sī chhim-soaⁿ-nâ-lāi to tio̍h!
Koh lâi lō͘ jú lâi jú sè-tiâu, tiám-á-ka lō͘ piàn-chò n̂g-thô͘ lō͘, su-ki ê piáu-chêng to̍h jú lâi jú kín-tiuⁿ án-ne, put-sî koh ē ùi ba̍k-khú-mih-á teh thau siòng góa ê bīn!
I kám sī teh khak-jīn lí sī-m̄-sī lâng?
Hèⁿ--lah, góa kám-kak sī! Ū-sî nā sī e-àm beh tńg-chhù! Ùn-chiàng ē hoán-èng koh jú tōa! Só͘-pái góa nā kàu chhù, chhiāⁿ chhiāⁿ ē ke hō͘ ùn-chiàng 1-kóa-á sió-hùi án-ne.
Ĕ, thiaⁿ lí kóng liáu góa a̍h sī kè-sio̍k lâi chò góa ê to͘-chhī sông hó--ah!
Hèⁿ ā! Tòa to͘-chhī bē-bái--lah! Lán chiat-bo̍k ê sî-kan mā chha-put-to beh kàu--ah, to-siā kok-ūi lâi phâng-tiûⁿ! Āu-lé-pài kāng sî-kan ài koh lâi ŏ͘! Ló͘-la̍t! To-siā! Păi-pāi!
