EP. 10 片頭
各位線頂ê聽眾朋友ta̍k-ê平安ta̍k-ê好，歡迎收聽做工á人pha-kheh-su̍h-to͘h，真歡喜koh hâm ta̍k-ke tī空中再相會！
Chit禮拜身體小可á koh-iūⁿ，人lóng bē青春neh！
你是koh án-chóaⁿ--ah？Nah ē事sái hiah chē?
Siáⁿ-mih koh！我kám有影不時lóng有狀況？
To有影m̄，你m̄是破病to̍h是心情bái，kui seng-khu kài-sêng無1 tè tio̍h--ê án-ne！Chit遍是koh án-chóaⁿ--ah？
Ah to閃--tio̍h-lah！Khû便所khû--lòe peh--khài to̍h tio̍h--ah。行1步疼1 ē koh kiam ài哀kúi lo̍h聲！2步路ài做10步行koh行bē了！實在真傷重！
Ăi-io͘h，有去hō͘醫生看--無？
有--lah！M̄-koh是閃--tio̍h了後，過kúi工á chiah去，疼kah連beh出門mā真困難，主要是mài改變姿勢to̍h無siáⁿ要緊，nā人beh sóa位，動作to̍h ài真慢，無ē疼kah哀哀叫án-ne。
你tio̍h khah保重--leh-lah。Chit-má有khah好--無？
有lah，無nah有才調tī chia主持？多謝你關心--lah！
無咱先進入咱ê主題，等--leh chiah ta̍uh-ta̍uh-á káng！
好ŏ͘！請奏音樂！
Kok-ūi sòaⁿ-téng ê thiaⁿ-chiòng pêng-iú ta̍k-ê pêng-an ta̍k-ê hó, hoan-gêng siu-thiaⁿ chò-kang-á-lâng pha-kheh-su̍h-to͘h, chin hoaⁿ-hí koh hâm ta̍k-ke tī khong-tiong chài-siong-hōe!
Chit lé-pài sin-thé sió-khóa-á koh-iūⁿ, lâng lóng bē chheng-chhun neh!
Lí sī koh án-chóaⁿ--ah? Nah ē sū-sái hiah chē?
Siáⁿ-mih koh! Góa kám ū-iáⁿ put-sî lóng ū chōng-hóng?
To ū-iáⁿ m̄, lí m̄ sī phòa-pēⁿ to̍h sī sim-chêng bái, kui seng-khu kài-sêng bô 1 tè tio̍h--ê án-ne! Chit piàn sī koh án-chóaⁿ--ah?
Ah to siám--tio̍h-lah! Khû piān-só͘ khû--lòe peh--khài to̍h tio̍h--ah. Kiâⁿ 1 pō͘ thiàⁿ 1 ē koh kiam ài ai kúi lo̍h siaⁿ! 2 pō͘ lō͘ ài chò 10 pō͘ kiâⁿ koh kiâⁿ bē liáu! Si̍t-chāi chin siong-tiōng!
Ăi-io͘h, ū khì hō͘ i-seng khòaⁿ--bô?
Ū--lah! M̄-koh sī siám--tio̍h liáu-āu, kòe kúi-kang-á chiah khì, thiàⁿ kah liân beh chhut-mn̂g mā chin khùn-lân, chú-iàu sī mài kái-piàn chu-sè to̍h bô siáⁿ iàu-kín, nā lâng beh sóa ūi, tōng-chok to̍h ài chin bān, bô ē thiàⁿ kah ai-ai-kiò án-ne.
Lí tio̍h khah pó-tiōng--leh-lah. Chit-má ū khah hó--bô?
Ū lah, bô nah ū châi-tiāu tī chia chú-chhî? To-siā lí koan-sim--lah!
Bô lán seng chìn-ji̍p lán ê chú-tê, tán--leh chiah ta̍uh-ta̍uh-á káng!
Hó ŏ͘! Chhiáⁿ chàu im-ga̍k!
EP. 10 片尾
Hó͘！你kám知影he閃--tio̍h ê tē 1 kang，我ùi 1樓peh到3樓ê房間有jōa辛苦？
是jōa kan-khó͘？
我發現我根本to khiā bē tiâu，goán bó͘講叫我坐tī樓梯1 gám 1 gám sóa，我to̍h照伊講--ê án-ne，koh真正有效，m̄-koh實在sóa kài慢，我to̍h ài giú樓梯koaiⁿ，koh配合kha出力，硬giú chiah有才調sóa 1 gám，teh sóa mā是疼，是講hit ê疼koh忍ē tiâu，m̄-koh sóa無kúi gám， to̍h ài歇喘了khah peh，有時手無夠力，to̍h ài kā頭khòe tī樓梯koaiⁿ，用ām-kún-á tàu出力，真辛苦！普通時beh peh 3樓lóng無siáⁿ感覺，hit chōa親像teh peh玉山án-ne！
真正有夠食力！
Ah bē soah--leh，我án-ne到3樓了後，看tio̍h門，我想想--leh，我真正無才調去開房間門，koh叫goán bó͘起來3樓開門，koh來我to̍h開始pê去mn̂g床。
Nah ē無叫lín bó͘ kā你chhah--起-來？
無法度，疼kah khiā bē tiâu，ke khiā ke疼--ê niâ，用pê--ê ta̍uh-ta̍uh-á sóa位，khah無hiah食力，我koh開真chē時間sóa到床邊，hit時，看mn̂g床，kāng款袂輸看tio̍h山án-ne…。
閃--tio̍h實在有夠恐怖，kan-na聽你講to̍h感覺chiok疼！
Hèⁿ ā，iáu-koh好，狀況ta̍k日lóng有進步，chit-má已經好kah差不多--a。人實在lóng m̄-thang破病，身體koh-iūⁿ ê時sûi to̍h感受tio̍h健康有jōa要緊。
Hèⁿ--lah，身體ài顧--lah！Tī chia mā chiok咱ê聽眾朋友身體健康好過日！咱今á日ê時間mā差不多--a，各位朋友ài ē記--leh ŏ͘，後禮拜kāng 1 ê時間請來空中再相會ŏ͘！Pai-pāi！
Hó͘! Lí kám chai-iáⁿ he siám--tio̍h ê tē 1 kang, góa ùi 1 lâu peh kàu 3 lâu ê pâng-keng ū jōa sin-khó͘?
Sī jōa kan-khó͘?
Góa hoat-hiān góa kin-pún to khiā bē tiâu, goán bó͘ kóng kiò góa chē tī lâu-thui 1 gám 1 gám sóa. Góa to̍h chiàu i kóng--ê án-ne, koh chin-chiàⁿ ū-hāu, m̄-koh si̍t-chāi sóa kài bān, góa to̍h ài giú lâu-thui-koaiⁿ, koh phòe-ha̍p kha chhut-la̍t, ngē giú chiah ū châi-tiāu sóa 1 gám, teh sóa mā sī thiàⁿ, sī kóng hit ê thiàⁿ koh jím ē tiâu, m̄-koh sóa bô kúi gám, to̍h ài hioh-chhoán liáu khah peh, ū-sî chhiú bô kàu la̍t, to̍h ài kā thâu khòe tī lâu-thui-koaiⁿ, iōng ām-kún-á tàu chhut-la̍t, chin sin-khó͘! Phó͘-thong sî beh peh 3 lâu lóng bô siáⁿ kám-kak, hit chōa chhin-chhiūⁿ teh peh Gio̍k-san án-ne!
Chin-chiàⁿ ū-kàu chia̍h-la̍t!
Ah bē soah--leh, góa án-ne kàu 3 lâu liáu-āu, khòaⁿ tio̍h mn̂g, góa siūⁿ-siūⁿ--leh, góa chin-chiàⁿ bô châi-tiāu khì khui pâng-keng mn̂g, koh kiò goán bó͘ khí-lâi 3 lâu khui-mn̂g, koh lâi góa to̍h khai-sí pê khì mn̂g-chhn̂g.
Nah ē bô kiò lín bó͘ kā lí chhah--khí-lâi?
Bô hoat-tō͘, thiàⁿ kah khiā bē tiâu, ke khiā ke thiàⁿ--ê niâ, iōng pê--ê ta̍uh-ta̍uh-á sóa-ūi, khah bô hiah chia̍h-la̍t, góa koh khai chin-chē sî-kan sóa kàu chhn̂g-piⁿ, hit sî, khòaⁿ mn̂g-chhn̂g, kāng-khoán bē-su khòaⁿ tio̍h soaⁿ án-ne….
Siám--tio̍h si̍t-chāi ū-kàu khióng-pò͘, kan-na thiaⁿ lí kóng to̍h kám-kak chiok thiàⁿ!
Hèⁿ ā, iáu-koh hó, chōng-hóng ta̍k ji̍t lóng ū chìn-pō͘, chit-má í-keng hó kah chha-put-to--a. Lâng si̍t-chāi lóng m̄-thang phòa-pēⁿ, sin-thé koh-iūⁿ ê sî sûi to̍h kám-siū tio̍h kiān-khong ū jōa iàu-kín.
Hèⁿ--lah, sin-thé ài kò͘--lah! Tī chia mā chiok lán ê thiaⁿ-chiòng pêng-iú sin-thé kiān-khong hó kòe-ji̍t! Lán kin-á-ji̍t ê sî-kan mā chha-put-to--a, kok-ūi pêng-iú ài ē-kì--leh ŏ͘, āu-lé-pài kāng 1 ê sî-kan chhiáⁿ lâi khong-tiong chài-siong-hōe ŏ͘! Pai-pāi!
