EP. 11 片頭
各位線頂ê聽眾朋友ta̍k-ê平安ta̍k-ê好，歡迎收聽做工á人pha-kheh-su̍h-to͘h，真歡喜koh hâm ta̍k-ke tī空中再相會！
食飽bē？
食飽--ah！你--leh？
食飽--ah！我是想tio̍h咱臺灣人teh相借問，本底是講食飽bē，尾--á時代teh行，漸漸mā變做有teh講你好，Hollo，Hi chit款--ê，想tio̍h食飽bē chiâⁿ久無sa出來講，thiau工koh講--1-ē！
Hiò͘，咱to̍h ài chhiāⁿ講，chit kóa話khah bē無--去！有時lóng ē hiông-hiông想tio̍h 1 kóa詞，gín-á時tiāⁿ leh講，m̄知是án-chóaⁿ soah真久m̄-bat講出嘴，想--tio̍h ê時lóng ē感覺有夠懷念--ê！
Hèⁿ ā，一直講台語to̍h有chit ê好處！有ê話tī記智內底chhàng chiâⁿ深，無張持ē ka-tī走--出-來，凡勢he是咱chit-má lóng teh做復健，母語ê復健án-ne。
好！時間差不多--a！咱節目繼續進行ŏ͘！請奏音樂！
請liâu！
Kok-ūi sòaⁿ-téng ê thiaⁿ-chiòng pêng-iú ta̍k-ê pêng-an ta̍k-ê hó, hoan-gêng siu-thiaⁿ chò-kang-á-lâng pha-kheh-su̍h-to͘h, chin hoaⁿ-hí koh hâm ta̍k-ke tī khong-tiong chài-siong-hōe!
Chia̍h-pá bē?
Chia̍h-pá--ah! Lí--leh?
Chia̍h-pá--ah! Góa sī siūⁿ tio̍h lán Tâi-oân-lâng teh sio-chioh-mn̄g, pún-té sī kóng chia̍h-pá-bē, bóe--á sî-tāi teh kiâⁿ, chiām-chiām mā piàn-chò ū teh kóng lí-hó, Hello, Hi chit khoán--ê, siūⁿ tio̍h chia̍h-pá-bē chiâⁿ kú bô sa chhut-lâi kóng, thiau-kang koh kóng--1 ē!
Hiò͘, lán to̍h ài chhiāⁿ kóng, chit kóa ōe khah bē bô--khì! Ū-sî lóng ē hiông-hiông siūⁿ tio̍h 1 kóa sû, gín-á sî tiāⁿ leh kóng, m̄-chai sī án-chóaⁿ soah chin-kú m̄-bat kóng chhut-chhùi, siūⁿ--tio̍h ê sî lóng ē kám-kak ū-kàu hoâi-liām--ê!
Hèⁿ ā, it-ti̍t kóng Tâi-gí to̍h ū chit ê hó-chhù! Ū ê ōe tī kì-tî lāi-té chhàng chiâⁿ chhim, bô-tiuⁿ-tî ē ka-tī cháu--chhut-lâi, hoān-sè he sī lán chit-má lóng teh chò ho̍k-kiān, bó-gí ê ho̍k-kiān án-ne.
Hó! Sî-kan chha-put-to--a! Lán chiat-bo̍k kè-sio̍k chìn-hêng ŏ͘! Chhiáⁿ chàu im-ga̍k!
Chhiáⁿ liâu!
EP. 11 片尾
Tú-chiah講tio̍h食飽bē soah去想tio̍h講，m̄知ta̍k ê 3頓lóng án-chóaⁿ食，去買a̍h是ka-tī煮？
Nā我--o͘h，大khài是1半1半，看心情看時間án-ne！
Án-chóaⁿ講？
有時是無閒kah無時間thang煮，趕beh食飯，當然mā是買買--leh khah直，有時雖bóng是時間會赴煮，人nā無閒kah siān-tauh-tauh，mā是用買--ê，煮飯實在是kài thiám。Ah你--leh？
Goán是3頓lóng ka-tī處理，早頓有時是買便--ê，包á a̍h是bán-thô，炊--1-ē to̍h有thang食，中晝暗頓to̍h ka-tī煮--ah，1 ê人煮1 ê人洗碗án-ne，真罕tit leh食外口。
Ta̍k kang煮是真無簡單neh！主要m̄是bē-hiáu煮，是ài一直換菜路，總是bē-tàng ta̍k-kang lóng食kāng款--ê，ē ià-siān！
Hèⁿ ā！我mā感覺厝--ni̍h負責煮菜--ê kài辛苦，我tiāⁿ leh想，nā beh煮飯--ā，菜單ē自動ùi天頂lak--落-來m̄知有jōa好！
想bóng想，mài做眠夢，tāi-chì to̍h是無hiah好khang--lah！
食是ta̍k tǹg ài食，煮是真giâ-chhia，真感謝ta̍k日替咱煮食ê人，今á日ê節目時間mā差不多beh到--ah，真感謝ta̍k-ke來tàu捧場，後禮拜kāng 1 ê時間再會--ō͘！Păi-pāi，păi-pāi感冒ka嗽bē koh來！
Ah你koh leh學廣告詞！Hḿ…，soán--ah，m̄ hâm你計較--lah！Ta̍k-ke再會ō͘！
Tú-chiah kóng tio̍h chia̍h-pá-bē soah khì siūⁿ tio̍h kóng, m̄-chai ta̍k ê 3 tǹg lóng án-chóaⁿ chia̍h, khì bé a̍h-sī ka-tī chú?
Nā góa--o͘h, tāi-khài sī 1 pòaⁿ 1 pòaⁿ, khòaⁿ sim-chêng khòaⁿ sî-kan án-ne!
Án-chóaⁿ kóng?
Ū-sî sī bô-ēng kah bô sî-kan thang chú, kóaⁿ beh chia̍h-pn̄g, tong-jiân mā sī bé bé--leh khah-ti̍t, ū-sî sui-bóng sī sî-kan ē-hù chú, lâng nā bô-ēng kah siān-tauh-tauh, mā sī iōng bé--ê, chú-pn̄g si̍t-chāi sī kài thiám. Ah lí--leh?
Goán sī 3 tǹg lóng ka-tī chhú-lí, chá-tǹg ū-sî sī bé piān--ê, pau-á a̍h-sī bán-thô, chhoe--1-ē to̍h ū thang chia̍h, tiong-tàu àm-tǹg to̍h ka-tī chú--ah, 1 ê lâng chú 1 ê lâng sé-óaⁿ án-ne, chin hán-tit leh chia̍h gōa-kháu.
Ta̍k kang chú sī chin bô kán-tan neh! Chú-iàu m̄ sī bē-hiáu chú, sī ài it-ti̍t ōaⁿ chhài-lō͘, chóng-sī bē-tàng ta̍k-kang lóng chia̍h kāng-khoán--ê, ē ià-siān!
Hèⁿ ā! Góa mā kám-kak chhù--ni̍h hū-chek chú-chhài--ê kài sin-khó͘, góa tiāⁿ leh siūⁿ, nā beh chú-pn̄g--ā, chhài-toaⁿ ē chū-tōng ùi thiⁿ-téng lak--lo̍h-lâi m̄ chai ū jōa-hó!
Siūⁿ bóng siūⁿ, mài chò bîn-bāng, tāi-chì to̍h sī bô hiah hó-khang--lah!
Chia̍h sī ta̍k tǹg ài chia̍h, chú sī chin giâ-chhia, chin kám-siā ta̍k-ji̍t thè lán chú-chia̍h ê lâng, kin-á-ji̍t ê chiat-bo̍k sî-kan mā chha-put-to beh kàu--ah, chin kám-siā ta̍k-ke lâi tàu phâng-tiûⁿ, āu-lé-pài kāng 1 ê sî-kan chài-hōe--ō͘! Păi-pāi, păi-pāi kám-mō͘ ka-sàu bē koh lâi!
Ah lí koh leh o̍h kóng-kò sû! Hḿ…, soán--ah, m̄ hâm lí kè-kàu--lah! Ta̍k-ke chài-hōe ō͘!
