Nauh，mā有人講ngauh。
Nauh，khêng-si̍t有kúi-lo̍h ê意思，咱sòa--落-來ē 1項1項á來解說。
1種是nga̍uh-nga̍uh唸，ka-tī唸，細聲á唸，m̄是beh講hō͘別人聽，有時á四pêng邊--a lóng無人mā leh唸，真單純to̍h是愛唸bóng唸ê狀況。Nā有chit款症頭，咱話ē-tàng án-ne講：「你ka-tī 1 ê人tī hia是leh nauh siáⁿ hòe，壓力是有hiah大hio͘h？」Koh親像tī A郎ê故事內底，a婆--ā講：「O͘h！天氣chiâⁿ好neh！」Chit種ka-tī講hō͘ ka-tī聽ê情形，mā ē-tàng講是nauh。
Koh有1款是講1寡khah無正式ê話，可能是teh講別人ê閒á話，a̍h是講1寡khah風聲pòng影ê tāi-chì，ka當做1種teh開講ê話題leh講，親像講「你nah ē知影林--ê in beh 嫁chŏ͘-kiáⁿ？」「To買菜去tú tio̍h春枝--a，伊leh nauh hō͘我聽--ê。」Mā ē-tàng講「無證無據ê tāi-chì，你a̍h leh sa leh四界nauh。」
Nauh koh有1種解說，to̍h是去hō͘狗á咬--tio̍h，真快速咬--落-去hit款，m̄是輕輕á咬，nā是講soe kah老mo͘h-mo͘h，去hō͘鱷魚，a̍h鯊魚咬--tio̍h，mā ē-tàng講是ho͘ nauh--tio̍h。
Siāng尾1種to̍h是pō͘ mi̍h-kiāⁿ，親像講「你嘴tī hia nauh--leh nauh--leh，是leh食sáⁿ-mih好khang--ê？」
Nauh, mā ū lâng kóng ngauh.
Nauh, khêng-si̍t ū kúi-lo̍h ê ì-sù, lán sóa--lo̍h-lâi ē 1 hāng 1 hāng-á lâi kái-soeh.
1 chióng sī nga̍uh-nga̍uh liām, ka-tī liām, sè-siaⁿ-á liām, m̄ sī beh kóng hō͘ pa̍t-lâng thiaⁿ, ū-sî-á sì-pêng piⁿ--á lóng bô lâng mā leh liām, chin tan-sûn to̍h sī ài liām bóng liām ê chōng-hóng. Nā ū chit khoán chèng-thâu, lán ōe ē-tàng án-ne kóng: “lí ka-tī 1 ê lâng tī hia sī leh nauh siáⁿ hòe, ap-le̍k sī ū hiah tōa hio͘h?” Koh chhin-chhiūⁿ tī A-lông ê kò͘-sū lāi-té, a-pô--ā kóng: “O͘h! Thiⁿ-khì chiâⁿ hó neh!” Chit chióng ka-tī kóng hō͘ ka-tī thiaⁿ ê chêng-hêng, mā ē-tàng kóng sī nauh.
Koh ū 1 khoán sī kóng 1 kóa khah bô chèng-sek ê ōe, khó-lêng sī teh kóng pa̍t-lâng ê êng-á-ōe, a̍h sī kóng 1 kóa khah hong-siaⁿ pòng-iáⁿ ê tāi-chì, ka tòng-chò 1 chióng teh khai-káng ê ōe-tê leh kóng, chhin-chhiūⁿ kóng “Lí nah ē chai-iáⁿ Lîm--ê in beh kè chŏ͘-kiáⁿ?” “To bé chhài khì tú tio̍h Chhun-ki--a, i leh nauh hō͘ góa thiaⁿ--ê.” Mā ē-tàng kóng “Bô chèng bô kù ê tāi-chì, lí a̍h leh sa leh sì-kè nauh.”
Nauh koh ū 1 chióng kái-soeh, to̍h sī khì hō͘ káu-á kā--tio̍h, chin khoài-sok kā--lo̍h-khì hit khoán, m̄ sī khin-khin-á kā, nā sī kóng soe kah lāu-mo͘h-mo͘h, khì hō͘ kho̍k-hî, a̍h soa-hî kā--tio̍h, mā ē-tàng kóng sī ho͘ nauh--tio̍h.
Siāng bóe 1 chióng to̍h sī pō͘ mi̍h-kiāⁿ, chhin-chhiūⁿ kóng “Lí chhùi tī hia nauh--leh nauh--leh, sī leh chia̍h sáⁿ-mih hó-khang--ê?”
